2023-nji ýylyň 1-nji martyndan başlap, “Azerbaýjan Kaspi Deňiz Parohodçylygy” («Азербайджанское Каспийское Морское Пароходство») Baku-Türkmenbaşy-Baku ugry boýunça awtoulaglaryň gatnaw bahalaryny arzanlatjakdygyny habar berdi. Bu barada Sputnik agentligine salgylanyp, “Turkmenportal” habarlar web-saýty habat berýär.
Bir adaty ýük awtoulagy (TIR uzynlygy 16,5 metr) bir tarapa (Baku-Türkmenbaşy ýa-da Türkmenbaşy-Baku) daşamak üçin nyrh 1072 $ däl-de, 1000 $ bolar.
Iki tarap üçin petekler deslapdan satyn alnan ýagdaýynda nyrh 1716 $ ýerine 1600 $ bolar.
Tigirli ulaglaryň uzynlygy 16,5 metrden köp ýa-da ondan az bolsa, bu ýagdaýda nyrhlaryň tigirli ulaglaryň uzynlygyna görä hasaplanýandygy bellenilýär.
Fewral aýynyň başyndan bäri ýeňil awtoulaglar bu ugurda arzanladylan nyrhlarda daşaldy. Häzirki wagtda ýeňil awtoulagy gämide daşamagyň bahasy 325 $ däl-de, 200 $.
Çeşmäniň belleýşi ýaly, nyrhlaryň arzanlamagy Hazaryň üsti bilen Türkmenistana awtoulaglary daşamak üçin amatly şertleri döretmäge gönükdirilendir.
