Mary welaýatyndaky «Türkmeniň ak öýi» binasynyň öňündäki giň meýdançada hem-de Tagtabazar etrabynyň – Pendi ýaýlasynyň gujagynda Milli bahar baýramy mynasybetli dabaralar ýaýbaňlandyryldy. Welaýat häkimliginiň, welaýat medeniýet müdirliginiň, syýasy partiýalaryň, jemgyýetçilik guramalarynyň bilelikde guramagynda geçirilen bu dabaralara dürli ugurda zähmet çekýän raýatlar, ýaşuly nesliň wekilleri, ýaşlar we çagalar gatnaşdylar.
Baýramçylyk dabaralarynda welaýatyň medeniýet we sungat işgärleriniň çykyşlaryna uly orun berildi. Toý lybasyna beslenen «Türkmeniň ak öýi» binasynyň öňündäki giň meýdançada we Pendi ýaýlasynda guralan alty ganat ak öýleriň, milli gymmatlyklary şöhlelendirýän senetçiligiň, zergärçiligiň, amaly-haşam we keşdeçilik sungatynyň, çagalar sungat mekdepleriniň okuwçylarynyň bahar gözelliklerini wasp edip çeken suratlarynyň sergileri toý märekesinde uly täsir galdyrdy. Mundan başga-da, dutarçy bagşylaryň, gopuzçy gyzlaryň, gargy tüýdükçileriň ýerine ýetiren milli aýdym-sazlary, folklorçylaryň läledir hüwdüleri baýramçylyk dabaralaryna şowhun çaýdy. Toý-dabaralarynda milli oýunlar oýnalyp, hiňňildikler uçuldy, şaman ody ýakylyp, ýagşy arzuw-dilegler edildi.
Hemmeleri dost-doganlyga çagyrýan bu ajaýyp baýramyň dabaralarynda bereketli gazanlardaky türkmen milli tagamlary, çörek we çörek önümleriniň dürli görnüşleri, toý pişmeleri, aýratynam, Nowruzda taýýarlanylýan semeni türkmeniň naz-nygmatly toý saçagynyň bezegine öwrüldi. Milli şaý-sepler bilen bezelen bedewleriň üstündäki ýigitleriň ussatlyk bilen görkezen dürli oýunlary hemmeleriň ünsüni çekdi. Şeýle hem bagtyýar çagalaryň «Aýterek-Günterek» oýny, ynsanyň ýakyn dosty hasaplanylýan türkmeniň alabaý itleri, olaryň güjüjekleriniň çagalar bilen edýän dürli oýunlary hem görkezildi.
Çeşme: «Turkmrnportal»
