Tur (Fransiýa) şäheriniň golaýyndaky A10 we A85 awtoulag ýollarynyň kesişýän ýerindäki ýük awtoulaglarynyň duralgasy döwrebaplaşdyrylýar we giňeldilýär. Bu barada «40ton» hem-de «comcomtvi.fr» portallarynyň maglumatlaryna salgylanýan «Логист.Today» habar berýär.
Awtoulag duralgasy 2021-nji ýylda «Center Routier Isoparc» ady bilen guruldy. Dynç alyş meýdançasy dolulygyna elektrik panelleri bilen örtülip, 146 awtoulagy goýmak üçin orunlary üpjün etdi. Şeýle-de bolsa, bu maýa goýum indi «TIP Secure Truck Parking Isoparc Sorigny» diýen adyny üýtgeden «TIP Group» kompaniýasyna geçirildi.
Alnyp barylýan işleriň bir bölegi hökmünde eýýäm «TIP Group» kompaniýasynyň awtoulag duralgalarynyň sanyny 146-dan 179-a çenli artdyrýandygy, gözegçilik ulgamyny giňeldýändigi, çäkleriň berkitmesini gowulandyrýandygy we howpsuzlyk gullugynyň peýda bolýandygy mälim edildi. Mundan başga-da, hajathana, duş, kir ýuwulýan jaý, sport zaly hem-de jemgyýetçilik otagy ýaly sürüjiler üçin degişli amatlyklary bolan düýbünden täze binany gurmak meýilnamasy durmuşa geçirilýär. Bularyň hemmesi 2025-nji ýylyň martyna çenli gurulmalydyr, häzirlikçe bolsa awtoulag duralgasy dolulygyna açyk bolmagynda galar.