Türkmenistanyň Pakistan Yslam Respublikasyndaky ilçihanasynyň başlangyjy bilen BMG-niň Pakistandaky hemişelik utgaşdyryjysynyň edarasy we Yslamabat strategiki barlaglar instituty bilen bilelikde, bu institutyň binasynda «Halkara parahatçylyk we ynanyşmak ýyly: Parahatçylygyň hatyrasyna hyzmatdaşlyk» atly maslahat geçirildi.
Ilçihananyň resmi saýtynda berilýän habara görä, maslahat iki bölümden ybarat bolup, oňa Pakistanyň daşary işler ministrliginiň goşmaça sekretary Saýed Haýdar Şah, Yslamabat strategiki barlaglar institutynyň Dolandyryjylar geňeşiniň başlygy Halid Mahmud, Yslamabat strategiki barlaglar institutynyň baş direktory Sohail Mahmud, Yslamabat strategiki barlaglar institutynyň Hytaý we Pakistan barlaglary merkeziniň müdiri Talat Şabbir, BMG-niň
Pakistandaky hemişelik utgaşdyryjysy Mohamed Ýahýa, Türkmenistanyň ilçisi A.Möwlamow, BMG-niň Ösüş Maksatnamasynyň Pakistandaky hemişelik wekiliniň kömekçisi Ammar Durrani, Pakistanyň Milli Goranmak uniwersitetiniň Parahatçylygy we dawa-jenjelleri öwreniş bölüminiň müdiri Mariýa Saifuddin Effendi we Pakistanyň Hytaýdaky öňki ilçisi Masud Halid dagy çykyş etdiler.
Ilçi A.Möwlamow öz çykyşynda Türkmenistanyň halkara gatnaşyklarda parahatçylygy we ynamy güýçlendirmek ugrundaky halkara tagallalaryny birleşdirmek, munuň üçin degişli syýasy-diplomatik şertleridir mümkinçilikleri döretmek boýunça syýasaty barada gürrüň berdi. Şu nukdaýnazardan, Türkmenistanyň başlangyjy bilen BMG-niň Baş Assambleýasynyň 2025-nji ýyly «Halkara parahatçylyk we ynanyşmak ýyly» diýip yglan edendigi we Türkmenistanyň Halkara parahatçylyk we ynanyşmak ýylynyň dowamyndaky işleriniň we ileri tutulýan ugurlarynyň Konsepsiýasynyň kabul edendigi bellenildi.
Şeýle hem, 2023-nji ýylda Türkmenistanyň Prezidenti Serdar Berdimuhamedowyň BMG-niň Baş Assambleýasynyň münberinden Ählumumy Howpsuzlyk Strategiýasyny işläp düzmek baradaky başlangyjyna çärä gatnaşyjylaryň ünsi çekildi.
Maslahatda çykyş edenler halkara gatnaşyklaryny oňyn akyma getirmek, halkara syýasatda özara ynamy berkitmek we halklaryň arasyndaky dialogy dikeltmek üçin şertleri döretmek boýunça bilelikdäki tagallalaryň möhümdigini bellediler. Häzirki wagtda bu ýörelgeleriň we maksatlaryň bar bolan ulgamlaýyn halkara meseleler bilen bagly has möhümdigi bellendi. Şeýle hem, 2025-nji ýyl diňe bir Türkmenistanyň däl, eýsem tutuş dünýä jemgyýetçiliginiň taryhynda ynam, hyzmatdaşlyk we özara düşünişmek ýörelgelerine esaslanýan dünýäni gurmak üçin täze gözýetimler açjak möhüm tapgyr boljakdygy nygtaldy.
Çeşme: «Awtomobil ulag hyzmaty»
