Xiaomi öz 15 ýyllyk ýubileýi mynasybetli SU7 elektrik sedanynyň aýratyn reňke eýe bolan görnüşini görkezdi. Goýy gyrmyzy öwüşgin modeliň reňk toplumynda onunjy boldy. Bu reňke diňe awtoulagyň kuzowy däl-de, eýsem tigir diskleri hem boýalypdyr, olar sary tormoz supportalary bilen täsirli gapma-garşylyk döredýär, şeýle hem bamperiň bölekleri hem goýy gyrmyzy reňke eýe bolupdyr – diýip, auto.mail.ru saýty habar berýär. Täze reňkiň özboluşlylygy bahada hem öz beýanyny tapýar - goşmaça töleg 9 müň ýuan bolar, bu bolsa beýleki reňk çözgütlerinden 2 müň ýuan gymmatdyr. CarNewsChina neşiriniň maglumatlaryna görä, goýy gyrmyzy görnüşi aýratyn-da zenan awtosöýüjiler üçin özüne çekiji bolup, olar eýýäm modeliň satyn alyjylarynyň uly bölegini düzýär.
Xiaomi kompaniýasynyň baş müdiri Leý Szýunyň belleýşi ýaly, aýal-gyzlar SU7 elektromobiliniň müşderi binýadynyň 40%-den gowragyny emele getirýär we bu san ýakyn wagtda ähli satuwlaryň ýarysyna ýetip biler. Giň reňk toplumy SU7 elektromobiliniň bazardaky üstünliginiň esasylarynyň birine öwrüldi. Köp sanly hytaý awtoulag öndürijileriniň 4-6 reňk bilen çäklenýän wagty, Xiaomi satyn alyjylara ulaglary 10 dürli öwüşginden saýlamaga mümkinçilik berýär, bu bolsa aýratyn-da awtosöýüjileriň ýaş nesli üçin özüne çekiji bolup durýar.
Çeşme: «Awtomobil ulag hyzmaty»
