BAE-niň port we logistika operatory AD Ports Sues kanalynyň ykdysady zolagynyň operatory bilen 50 ýyllyk peýdalanmak hakynda ylalaşyga gol çekendigini habar berdi. Bu ylalaşyk kompaniýa Sues kanalynyň Ortaýer deňzindäki giriş nokadynda ýerleşýän Müsüriň Port-Said portunyň golaýynda senagat-logistika parkynyň gurluşygyna we soňraky dolandyryşyna hukuk berýär.
AD Ports kompaniýasynyň habar bermegine görä, 20 inedördül kilometr umumy meýdany bolan senagat-logistika parky tapgyrlaýyn gurlar. Şu ýylda 2,8 inedördül kilometr meýdany bolan birinji tapgyryň gurluşyk işlerine girişilmegi meýilleşdirilýär. Birinji tapgyrdaky maýa goýumlarynyň möçberi 120 million ABŞ-nyň dollary bolar diýlip baha berilýär.
Ylalaşyga düşündiriş bermek bilen, AD Ports Group kompaniýasynyň ýolbaşçysy Mohamed Juma Al Şamisi Port-Said portunyň senagat-logistika parkynyň strategiki taýdan ýerleşişi sebäpli «Sues kanalynyň Gündogar-Günbatar söwda geçelgesini ösdürmekde we goldamakda ähmiýetini güýçlendirjekdigini» belledi.
AD Ports 2022-nji ýyldan bäri Müsürde işjeň maýa goýýar: şu döwürde kompaniýa Müsüriň Transmar gämi kompaniýasyny, TCI terminal operatoryny, Safina B.V. agent we ekspeditor kompaniýasyny satyn aldy, Gyzyl deňizdäki Safaga, Hurgada we Şarm-el-Şeýh portlarynda we Ortaýer deňzindäki Aýn-Sohna portunda üç syýahatçy terminalyny gurmak we dolandyrmak üçin uzak möhletli konsessiýalary aldy.
Çeşme: «Awtomobil ulag hyzmaty»
