Türkmenistanyň Mejlisiniň Başlygynyň we deputatlarynyň ýolbaşçylygyndaky wekiliýet Täjigistan Respublikasynyň Duşenbe şäherinde geçirilýän Merkezi Aziýa döwletleriniň 4-nji Parlamentara forumyna işjeň gatnaşyp, onuň çäklerinde geçirilen birnäçe ugurdaş mejlislerde çykyş etdi. Dabaraly çäreleriň çäklerinde Türkmenistanyň Mejlisiniň Başlygy «Dostluk» meýdançasyndaky Ismoil Somoniniň ýadygärligine gül goýmak dabarasyna hem gatnaşdy. Bu barada kanunçykaryjy edaranyň metbugat gullugy habar berdi.

«Parahatçylyk, sebit howpsuzlygy we parlament diplomatiýasyny ösdürmek» atly mejlisde Türkmenistanyň Mejlisiniň komitet başlygy M.Kulyýew çykyş edip, Prezident Serdar Berdimuhamedowyň parahatçylyk söýüjilikli daşary syýasatyna hamana BMG tarapyndan kabul edilen «Merkezi Aziýa – parahatçylyk, ynanyşmak we hyzmatdaşlyk zolagy» Kararnamasyna esaslanýan sebitara hyzmatdaşlygyň ähmiýetini nygtady.

«Ykdysady integrasiýa, durnukly ösüş we sebitleýin hyzmatdaşlygyň giňeldilmegi» atly mejlisde Türkmenistanyň wekilleri ýurdumyzda daşky gurşawy goramak, suw serişdelerini rejeli peýdalanmak, sirkulýar ykdysadyýete geçmek, sanlylaşdyrmak hem-de maýa goýumlary çekmek boýunça amala aşyrylýan döwlet maksatnamalary barada giňden maglumat berdiler.

«Suw, howa, ekologiýa howpsuzlygy sebitiň durnukly ösüşiniň binýadydyr» atly ekologiýa meselelerine bagyşlanan mejlisde Türkmenistanyň Mejlisiniň komitet başlygy B.Myradowa çykyş edip, ýurdumyzda «ýaşyl» ykdysadyýete geçmek, gaýtadan dikeldilýän energiýa çeşmelerini ösdürmek we metan zyňyndylaryny azaltmak boýunça durmuşa geçirilýän halkara başlangyçlary barada durup geçdi.

Forumyň jemleri boýunça gatnaşyjylar sebitde parahatçylygy, durnukly ykdysady ösüşi we ekologiýa abadançylygyny üpjün etmekde parlamentara hyzmatdaşlygy mundan beýläk-de berkitmäge ygrarlydyklaryny bildirdiler.