Gazagystan 2026-njy ýylyň 1-nji ýanwaryna çenli ÝAYB (Ýewraziýa ykdysady bileleşigi) ýurtlarynyň ýük daşaýjylaryna täzeden tirkemek (täzeden ýüklemek) arkaly ýük daşamagy rugsat etdi. Bu çözgüt Gazagystanyň Ulag ministrligi tarapyndan 2025-nji ýylyň 11-nji fewralynda çykarylan 47-nji belgili buýruk bilen berkidildi. Resminama laýyklykda hereket edýän düzgünleriň 51-nji bendiniň ikinji böleginiň we 54-nji bendiniň talaplary, eger-de Gazagystanyň çägine/çäginden ýük daşamak birnäçe daşaýjy tarapyndan täzeden ýüklemek (ýüklemek/düşürmek) we (ýa-da) öňki daşaýjynyň rugsady bolan ýagdaýynda tirkegi çalyşmak arkaly amala aşyrylýan bolsa, Ýewraziýa ykdysady bileleşiginiň ýurtlarynda hasaba alnan daşaýjylara degişli däldir. Bu barada Belarusyň ýük daşaýjylar assosiýasiýasy «BAMAP» habar berýär. Bu düzgün 10-njy fewralda güýje girdi we 2026-njy ýylyň 1-nji ýanwaryna çenli hereket eder.
Mundan başga-da, BAMAP gümrük üstaşyry düzgüninde duran ýükleriň, eger-de Gazagystanyň çägi ugradyş ýa-da barmaly nokady bolmasa, şeýle hem eger-de täzeden ýüklenýän ulag serişdesi ilkibaşdaky daşaýjynyň hasaba alnan ýurdunda hasaba alynmadyk bolsa, gazak ulag serişdelerine täzeden ýüklenmegine rugsat berilmeýändigini anyklady. Şunuň bilen birlikde, Gazagystanyň çäginde tirkeýji ýa-da ýük awtoulagyny çalyşmaga diňe ýük daşaýjynyň hasaba alnan ýurdunda bellige alnan ulag serişdesine rugsat berilýär.
Şeýle-de Gazagystanyň ulag ministriniň 2024-nji ýylyň 9-njy fewralyndaky 61-nji belgili buýrugynda soňky ýük daşaýjynyň birinji ýük daşaýjynyň Gazagystanda alnan rugsatnamasynyň bolmaly diýen talabynyň berkidilendigini bellemek gerek. Şeýle rugsatnamanyň ýoklugy, Gazagystan Respublikasynyň administratiw hukuk bozulmalary hakyndaky kodeksiniň 573-nji maddasyna laýyklykda ýük daşaýjynyň jogapkärçilige çekilmegine esas bolup biler.
Çeşme: «Awtomobil ulag hyzmaty»
