Russiýanyň demirýol ulgamy arkaly Hytaýa ýük daşamak ösmegini dowam etdirýär. RŽD kompaniýasy öz Telegram-kanalynda habar berşi ýaly, Russiýanyň demir ýollarynyň başlygynyň birinji orunbasary Sergeý Pawlow «TransRussiýa» maslahatynyň umumy mejlisinde bu barada gürrüň berdi.

Onuň sözlerine görä, 2025-nji ýylyň ýanwar-fewral aýlarynda HHR-dan Russiýanyň demir ýol ulgamy arkaly 30 million tonnadan gowrak ýük daşaldy. Bu 2024-nji ýylyň degişli döwri bilen deňeşdirilende 9,3% köpdür.

«Gündogar ugurda halkara ulag gatnawlarynyň ösüşi Ýewraziýadaky hyzmatdaşlarymyz, ilkinji nobatda, Belarusyň we Gazagystanyň demir ýollary bilen bilelikde alnyp barylýan tagallalar bilen üpjün edilýär» — diýip, S.Pawlow belledi.

Şeýle hem ol Mongoliýanyň Ýewraziýanyň ýük gatnawlarynyň akymlary üçin möhüm ulag arteriýasy hökmünde ornunyň artýandygyny nygtap geçdi.

Russiýanyň demir ýollary «Ulan-Bator demir ýoly» rus-mongol bilelikdäki kärhanasynyň paýlarynyň toplumyny dolandyrýar.

2024-nji ýylda «Ulan-Bator demir ýoly» ulgamynda ýük daşamagyň möçberi 33,4 million tonna barabar bolup, ol rekord derejä ýetdi. 2030-njy ýyla çenli ýük daşamagyň möçberini 1,5 esse artdyrmak, ýagny ony 50 million tonna çenli ýokarlandyrmaklyk meýilleşdirilýär.

Çeşme: «Awtomobil ulag hyzmaty»