Türkmenistanyň Prezidenti sanly ulgam arkaly Ministrler Kabinetiniň nobatdaky mejlisini geçirdi. Mejlisiň dowamynda Ministrler Kabinetiniň Başlygynyň orunbasary, daşary işler ministri R.Meredow şu ýylyň 24-25-nji noýabry aralygynda Gazagystan Respublikasyna meýilleşdirilýän döwlet saparyna taýýarlyk görlüşi barada hasabat berdi.

Mälim bolşy ýaly, Türkmenistan bilen Gazagystan Respublikasynyň arasynda diplomatik gatnaşyklar 1992-nji ýylyň oktýabr aýynda ýola goýuldy. Iki döwletiň arasyndaky hyzmatdaşlygyň şertnamalaýyn-hukuk binýady resminamalaryň 180-si bilen berkidildi.

Döwlet saparynyň dowamynda ýokary derejedäki türkmen-gazak gepleşikleriň jemleri boýunça resminamalaryň uly toplumyna gol çekilmegi meýilleşdirilýär.

Türkmenistanyň Prezidenti hasabaty diňläp, wise-premýere Gazagystan Respublikasyna boljak döwlet saparyna gowy taýýarlyk görmegi tabşyrdy.