Gökdepe etrabynyň «Eziz» merkezinde «Ýylyň zenany» atly bäsleşigiň welaýat tapgyry geçirildi. Ahal welaýat häkimligi, Türkmenistanyň Zenanlar birleşigi we Kärdeşler arkalaşyklary tarapyndan bilelikde guralan bu çäre Halkara zenanlar gününe hem-de ýurduň Garaşsyzlygynyň 35 ýyllygyna bagyşlandy.
Bäsleşigiň dowamynda oňa gatnaşyjylar hünär ugruny, telekeçiligi, jemgyýetçilik-syýasy durmuşy we ýaşlaryň terbiýesini öz içine alýan sekiz ugur boýunça öz gazanan üstünliklerini görkezdiler.
Eminler toparynyň agzalary diňe bir zenanlaryň işewürlik ukyplaryna we başlangyçlaryna baha bermek bilen çäklenmän, eýsem, olaryň maşgala sütünleriniň berkidilmegine hem-de watançylyk terbiýesine goşan goşantlaryna-da aýratyn üns berdiler. Tapgyryň netijeleri boýunça her ugurda ýeňijiler kesgitlenildi, olar bäsleşigiň Aşgabatda geçiriljek jemleýji tapgyrynda welaýata wekilçilik ederler.
Çäre Ahal welaýatynyň Kärdeşler arkalaşyklarynyň birleşmesi tarapyndan gymmat bahaly sowgatlaryň dabaraly gowşurylmagy bilen tamamlandy.
