Hormatly Prezidentimiz Serdar Berdimuhamedow 18-nji aprelde sanly ulgam arkaly Ministrler Kabinetiniň nobatdaky mejlisini geçirdi. Mejlisiň dowamynda döwlet durmuşynyň dürli ugurlaryna, şol sanda kanunçylygy kämilleşdirmek, ykdysadyýet, energetika, oba hojalygy we medeniýet meselelerine garaldy. Bu barada «Türkmenistan: Altyn asyr» elektron gazeti habar berdi.
Mejlisde, ilki bilen, ýurdumyzyň kanunçylyk binýadyny döwrebaplaşdyrmak boýunça alnyp barylýan işler barada maglumat berildi. Hususan-da, adam hukuklaryny goramak, senagat howpsuzlygy, migrasiýa we ykdysadyýet ulgamlaryna degişli täze kanun taslamalarynyň kabul edilendigi bellenildi.
Döwlet Baştutanymyz halkara standartlara laýyk gelýän täze hukuk namalaryny taýýarlamak işlerini dowam etdirmegiň zerurdygyny aýtdy.
Ykdysady we maliýe meseleleriniň çäginde bank edaralarynyň ýyllyk maliýe hasabatlaryna halkara standartlar esasynda audit barlaglaryny geçirmek baradaky teklip ara alnyp maslahatlaşyldy. Hormatly Prezidentimiz bank ulgamyny kämilleşdirmegiň möhümdigini nygtap, bu ugurdaky işlere badalga berdi.
Energetika pudagynda taryhy ähmiýetli ädim ädildi. «Türkmengaz» döwlet konserniniň düzüminde «Galkynyşgaz» döwlet kärhanasyny döretmek hakynda Karar kabul edildi. Bu düzüm «Galkynyş» gaz känini özleşdirmegiň dördünji tapgyrynyň çäginde Hytaýyň kompaniýalary bilen hyzmatdaşlykda alnyp barylýan işlere gözegçilik eder we täze desgalary dolandyrar.
Oba hojalygynda bolsa gowaça ekişini bellenen möhletde tamamlamak, bugdaý meýdanlaryna ideg etmek we galla oragyna taýýarlyk görmek meselelerine üns çekildi. Şeýle hem Türkmen bedewiniň milli baýramyna ýokary derejede taýýarlyk görmek boýunça degişli wise-premýere anyk tabşyryklar berildi.
Gurluşyk ulgamynda täze milli çykdajy-ölçeg binýadyny ulanyşa girizmek baradaky teklip goldanyldy. Bu täzelik gurluşyk işlerini döwrüň talaplaryna laýyklykda ylmy esasda guramaga we öňdebaryjy tehnologiýalary ornaşdyrmaga mümkinçilik berer.
Halkara hyzmatdaşlyk ugrunda paýtagtymyzda geçiriljek Türkmen-hytaý işewürler forumyna we sergisine görülýän taýýarlyk barada hasabat berildi. Bu çärä Hytaýyň 80-den gowrak iri kompaniýasynyň gatnaşmagyna garaşylýar, bu bolsa iki ýurduň arasyndaky söwda-ykdysady gatnaşyklary täze derejä çykarar.
Medeni-ynsanperwer ulgamlarda TÜRKSOÝ guramasy bilen hyzmatdaşlykda meşhur kompozitor Weli Muhadowyň 110 ýyllygyna bagyşlanan çäreleri we opera günlerini geçirmek meýilleşdirildi. Şonuň bilen birlikde, çagalaryň tomusky dynç alyş möwsümini Gökderede, «Awaza» milli syýahatçylyk zolagynda we welaýatlarda guramaçylykly geçirmek meseleleri ara alnyp maslahatlaşyldy.
Ulag ulgamynda ilata edilýän hyzmatlaryň hilini ýokarlandyrmak we awtobus parklaryny täzelemek boýunça täze teklipler makullanyldy. Mejlisde beýleki birnäçe möhüm resminamalara hem gol çekildi we döwlet Baştutanymyz ähli gatnaşyjylara işlerinde üstünlik arzuw etdi.
