Hormatly Prezidentimiz Serdar Berdimuhamedow 24-nji aprelde sanly ulgam arkaly Ministrler Kabinetiniň nobatdaky mejlisini geçirdi. «Türkmenistan: Altyn asyr» elektron gazetiniň habar bermegine görä, mejlisiň dowamynda wise-premýer Taňryguly Atahallyýew ýurdumyzyň oba hojalyk pudagyndaky möwsümleýin işler hem-de Türkmen bedewiniň milli baýramyna görülýän taýýarlyk barada hasabat berdi.

Bellenilişi ýaly, häzirki wagtda welaýatlarda gowaça ekişi degişli meýilnama laýyklykda dowam edýär. Ekiş meýdanlarynda tehnikalaryň bökdençsiz işledilmegine we ilkinji ideg işlerine aýratyn üns berilýär. Şeýle hem azyk bolçulygyny üpjün etmek maksady bilen, bugdaý meýdanlarynda mineral dökünler bilen iýmitlendirmek we galla oragyna taýýarlyk görkezijileri barada maglumat berildi. Mundan başga-da, ýüpek gurçuklaryna ideg etmek we pile öndürmek boýunça agrotehniki çäreler amala aşyrylýar.

Hasabatyň çäklerinde Türkmen bedewiniň milli baýramyna bagyşlanan dabaraly çäreleriň taýýarlyk işleri barada hem durlup geçildi. Ahalteke bedewleriniň şanyna bellenilýän bu baýramy ýokary derejede guramak boýunça degişli meýilnamalaryň ýerine ýetirilýändigi bellenildi.

Döwlet Baştutanymyz hasabaty diňläp, oba hojalyk işleriniň, aýratyn-da, gowaça ekişiniň we bugdaý ideginiň bellenen möhletlerde, ýokary hilli geçirilmeginiň möhümdigini nygtady.

Hormatly Prezidentimiz Türkmen bedewiniň milli baýramyna bagyşlanan çäreleriň ýokary guramaçylyk derejesinde geçirilmelidigi barada wise-premýere anyk tabşyryklary berdi.