Türkmenistanyň Mejlisinde 11-nji iýulda geçirilen maslahatda 2026-njy ýylyň ýanwar-iýun aýlarynda ýerine ýetirilen işleriň jemleri ara alnyp maslahatlaşyldy. Seredilen meseleleriň hatarynda döwlet Baştutanymyzyň ýurtda durmuş-ykdysady özgertmeleriň hukuk binýadyny berkitmek barada öňde goýan wezipeleriniň durmuşa geçirilişi esasy orun eýeledi. Bu barada kanunçykaryjy edaranyň metbugat gullugy habar berdi.
Parlament agzalary Ministrler Kabinetiniň giňişleýin mejlisinde Türkmenistanyň Garaşsyzlygynyň 35 ýyllygyna bagyşlanan ýubileý medalyny döretmek hakyndaky Kanuna gol çeken döwlet Baştutanyna minnetdarlyk bildirdiler.
Hasabat döwrüniň dowamynda raýatlaryň hukuklaryny goramak, senagat howpsuzlygyny üpjün etmek, maliýe hasabatlylygyny kämilleşdirmek, ekologiýa hem-de migrasiýa syýasaty ýaly ugurlarda hereket edýän kanunçylyga möhüm üýtgetmeler we goşmaçalar girizildi. Şeýle-de maslahatda Türkmenistanyň Halk Maslahatynyň nobatdaky mejlisine hem-de şu ýylyň oktýabr aýynda «Awaza» milli syýahatçylyk zolagynda geçiriljek halkara çärelere ýokary derejede taýýarlyk görmekde deputatlaryň işjeňligini ýokarlandyrmagyň wajypdygy nygtaldy.
Duşuşykda halkara parlamentara gatnaşyklaryň, daşary ýurt wekilhanalary bilen geçirilen okuw maslahatlarynyň we tejribe alyşmak çäreleriniň ähmiýeti bellenildi. Deputatlar kabul edilýän kanunlaryň many-mazmunyny halk köpçüligine düşündirmegi hem-de ýurduň parahatçylyk söýüjilikli halkara başlangyçlaryny wagyz etmegi özleriniň öňünde duran ileri tutulýan ugurlaryň biri hökmünde kesgitlediler. Maslahata gatnaşyjylar milli kanunçylyk binýadyny döwrüň talaplaryna laýyk getirmek ugrunda mundan beýläk-de bar bolan tagallalaryny gaýgyrmajakdyklaryny nygtadylar.
