Türkmenistanyň Prezidenti hormatly Serdar Berdimuhamedow 6-njy oktýabrda Aşgabatdaky «Halk hakydasy» ýadygärlikler toplumynda geçirilen Hatyra güni mynasybetli gül goýmak dabarasyna gatnaşdy. Döwlet Baştutany 1948-nji ýylyň Aşgabat ýertitremesinde wepat bolanlaryň hem-de Watan goragynda şehit bolan gahrymanlaryň hatyrasyna bina edilen «Ruhy tagzym», «Milletiň ogullary» we «Baky şöhrat» ýadygärliklerine gül çemenlerini goýdy. Bu barada Türkmenistan Döwlet habarlar agentligi habar berdi.

Dabara Türkmenistanyň Döwlet senasynyň ýaňlanmagy bilen başlandy, soňra gurban bolanlaryň hatyrasyna «Keçpelek» sazy ýerine ýetirildi. Çärä döwlet ýolbaşçylary, harby we hukuk goraýjy edaralaryň, diplomatik we halkara guramalaryň wekilleri, hormatly ýaşulular, talyplar hem-de paýtagtymyzyň ýaşaýjylary gatnaşdy.

Hatyra gününde ýurdumyzyň ähli künjeklerinde 1948-nji ýylyň Aşgabat ýertitremesiniň pidalary, Watan ugrunda şehit bolan gahrymanlar hem-de 1941—1945-nji ýyllaryň urşunyň söweşijileri hormat bilen ýatlanyldy, olaryň ruhuna aýat-töwirler okalyp, sadakalar berildi.

Hormatly Prezidentimiz Serdar Berdimuhamedow Hatyra gününde öten-geçenleriň ýatlanylýandygyny belläp, berilýän doga-dilegleriň we sadakalaryň kabul bolmagyny arzuw etdi. Hatyra çäreleri Aşgabat bilen birlikde Arkadag şäherinde hem-de ýurdumyzyň ähli welaýatlarynda geçirildi.