«Döwrüm bagtyýar, ýolum ygtybar» atly hünär bäsleşiginiň ýurt boýunça jemleýji tapgyry geçirildi. Bäsleşigi Türkmenistanyň Kärdeşler arkalaşyklarynyň Milli merkezi, Türkmenistanyň Awtomobil ulaglary ministrligi hem-de Türkmenistanyň Awtomobil ýollary ministrligi bilelikde yglan etdi.
Jemleýji tapgyra iki ministrligiň edara-kärhanalarynda zähmet çekýän awtobus, ýeňil awtoulag, ýük awtoulagy we dürli ýöriteleşdirilen awtoulaglaryň 12 sürüjisi gatnaşdy. Düzgünnamä laýyklykda bäsleşik iki görnüş boýunça, ýagny ýolagçy awtoulaglarynyň sürüjileriniň we ýük awtoulaglarynyň sürüjileriniň arasynda geçirildi.
Gatnaşyjylara guramaçylyk topary tarapyndan awtoulagyň gurluşy we tehniki idegi, şeýle hem Türkmenistanyň Ýol hereketiniň düzgünleri we ilkinji lukmançylyk kömegi boýunça taýýarlanan synag sowalnamalary berildi.
Bäsleşigi yglan eden taraplaryň wekillerinden düzülen bäş adamdan ybarat emin agzalar topary ýeňijileri dogry jogaplaryň sanyna görä kesgitledi. Her görnüş boýunça üç baýrakly orun we üç höweslendiriji baýrak bellenildi.