2024-nji ýylda Gündogar Aziýany Ýewropa bilen baglanyşdyrýan demir ýolunyň Täze Ýüpek ýoly boýunça 380 000 TEU-dan gowrak ýük daşaldy, şol sanda Hytaýdan gaýdýan konteýner daşamalarynyň esasy bölegi Polşa gönükdirildi. Şunda Germaniýanyň orny nä derejede?
Ukraina bilen Russiýanyň arasyndaky ýaragly çaknyşyklar sebäpli ýewropaly logistika kompaniýalarynyň bu ugurdaky gyzyklanmasynyň pese gaçmagy zerarly iki ýyllyk aşak düşmeden soň, 2024-nji ýylda Ýewraziýanyň üstaşyr ugurlarynda intermodal demir ýol daşamalary ep-esli derejede dikeldildi.
Ýewraziýanyň demir ýol bileleşiginiň habar bermegine görä, 2024-nji ýylda Täze Ýüpek ýolundaky ýük daşamalaryň göwrümi 2023-nji ýyl bilen deňeşdirilende 80% artdy. 2023-nji ýyldaky 211 110 TEU, 2022-nji ýyldaky 410 520 TEU we 2021-nji ýyldaky 618 180 TEU bilen deňeşdirilende, 380 434 TEU barabar ýük daşaldy.
Ýük daşamalaryň esasy bölegi Polşanyň üsti bilen demirgazyk geçelgäniň üstünden geçýär:
-
2023-nji ýylda 117 628 TEU (umumy göwrümiň 55,7%-i),
-
2022-nji ýylda 178 520 TEU (43,5%),
-
2021-nji ýylda 206 178 TEU (33,4%).
Ýewraziýa demir ýol bileleşiginiň maglumatlary Polşa bilen Hytaýyň arasyndaky söwdada deňagramsyzlygy görkezýär. 2024-nji ýylda Polşadan Hytaýa diňe 8 626 TEU ýük daşaldy – bu 2023-nji ýyl bilen deňeşdirilende 24% köp.
Bu ulag hyzmatyndan peýdalanýan Ýewropanyň ikinji möhüm ýurdy Germaniýadyr. 2024-nji ýylda Hytaýdan Germaniýa 23 790 TEU barabar ýük daşaldy, bu öňki ýyl bilen deňeşdirilende 84,9% köp. Emma Germaniýadan Hytaýa ýük daşamalaryň göwrümi 2023-nji ýyl bilen deňeşdirilende 33% töweregi peseldi – ol 58 282 TEU-dan 39 079 TEU çenli pese gaçdy.
Täze Ýüpek ýolundaky demir ýol ulagy, aýratyn-da Gyzyl deňizdäki çökgünlikden soň, deňiz ýük daşamalaryna möhüm alternatiwa öwrüldi. Bu çökgünlik ýük daşaýan gämileri Ýagşy umyt burnunyň üsti bilen geçmäge mejbur etdi, bu bolsa ugurlary we çykdajylary ep-esli artdyrdy.
Gyzyl deňizdäki çaknyşyk Hytaý bilen Ýewropanyň arasyndaky ýük akymlarynyň 60%-den gowrak peselişe sezewar etdi, bu deňiz ýük daşamalarynyň bahasynda 78% ýokarlanma sebäp boldy. Bu ýagdaý Ýewraziýanyň logistikasyny demir ýol ugurlaryny işjeň ösdürmäge itergi berdi.
Ýük daşamalaryň howpsuzlygy, gysga wagtda eltilmegi we çykdajylaryň azalmagy sebäpli Hytaý — Merkezi Aziýa — Günbatar Aziýa ugrunyň meşhurlygy barha artýar. 2024-nji ýylda demir ýol bilen ýük daşamalaryň ortaça bahasy Hytaý-Ýewropa ugurlardaky deňiz ýük daşamalarynyň nyrhlaryndan 59% pes boldy.
Çeşme: «Awtomobil ulag hyzmaty»
