Kia kompaniýasy resmi taýdan täze PV5 täjirçilik elektromobilleriň hatary bilen tanyşdyrdy. Täze awtoulaglar E-GMP platformasynyň uýgunlaşdyrylan wersiýasynda gurlup, öň tarapda ýerleşdirilýän elektrik hereketlendirijisi bilen enjamlaşdyrylýar we sygymlylygy birnäçe görnüşde bolan akkumulýator batareýalary bilen hödürlenýär. Köp funksiýaly elektrikde işlejek furgon ulaglar ilki 2025-nji ýylyň ikinji ýarymynda Günorta Koreýanyň içerki bazaryndaky söwda meýdançalarynda peýda bolar, awtoulaglary halkara giňişliginde ýerlemek bolsa indiki ýylyň dowamynda meýilleşdirilýär – diýip, auto.ru saýty habar berýär.
PV5 maşgalasyna degişli awtoulaglaryň daşky keşbi baradaky maglumatlar ozal bölekleýin açylan bolsa-da, indi kompaniýa dürli täjirçilik maksatlary üçin niýetlenen ulagyň salonyny we olaryň kuzowynyň dürli konfigurasiýalaryny görkezdi. Täze modelleriň salony amatlylyga esaslanýan iň az derejedäki dizaýny bilen tapawutlanýar. Öndüriji aýratyn-da ýokary berklikdäki örtük materiallaryny, opsiýa enjamlarynyň giň sanawyny, funksional esbaplary we zat goýmak üçin köp sanly ýerleri göz öňünde tutupdyr.
Müşderilere hereketlendiriji batareýalaryň üç görnüşi: arzan täjirçilik görnüşleri üçin 43.3 kWt⋅sag. bolan esasy akkumulýator, şeýle hem bir zarýad edilende 400 kilometre çenli ýöremegi üpjün edýän 51.5 ýa-da 71.2 kWt⋅sag. möçberli ýokary sygymlylygy bolan batareýalar hödürlenýär.
Çeşme: «Awtomobil ulag hyzmaty»
