Gruziýa Hazarüsti halkara ulag ugrunyň (HHUU, Orta geçelge) ösdürilmegine aýratyn ähmiýet berýär.
Gruziýanyň hökümetiniň metbugat gullugyna salgylanmak bilen, Report neşiriniň habar berşi ýaly, Gruziýanyň premýer-ministri Irakli Kobahidze Özbegistanyň premýer-ministri Abdulla Aripow bilen bolan duşuşygynda bu barada pikirini beýan etdi.
«Biz ýurtlarymyzyň arasyndaky söwda hyzmatdaşlygyny has-da giňeltmeklige uly gyzyklanma bildirýäris. Şunda maýa goýum işlerini amala aşyrmaklyga hem giň mümkinçilikler döräp biler» - diýip, Irakli Kobahidze nygtady.
Onuň sözlerine görä, Gruziýa strategiki taýdan amatly ýerleşýär we taryhda Ýewropa bilen Aziýany, Günbatar bilen Gündogary baglanyşdyrypdy: «Biz bu strategiki amatly ýerleşýändigimizden has netijeli peýdalanmak isleýäris we bu ugurda Gruziýa bilen Özbegistanyň arasyndaky hyzmatdaşlyk örän netijeli we peýdaly bolup biler».
Çeşme: «Awtomobil ulag hyzmaty»
