Ýewropa Birleşiginde ýollarda hereket etmegiň Toplumynyň kabul edilmeginiň netijesinde ulag gatnawlarynyň düzgünlerine üýtgeşmeler birnäçe ýylyň dowamynda kem-kemden girizildi. Bu ýyl ulag gatnawlarynyň guralyşyna we sürüjileriň gündelik işine täsir etjek has möhüm üýtgeşmeler giriziler. Lardi.Today neşiri bu barada sürüjileriň iş wagtyny seljermek we hasaba almak boýunça programma üpjünçiligini we elektronika abzallaryny öndürijisi bolan Inelo kompaniýasynyň metbugat gullugy tarapyndan çap edilen materiallary öwrenmek bilen, käbir zatlar barada öz okyjylaryny habarly etdi.
Ýollarda hereket etmegiň Toplumy (Mobility Package) — bu sürüjiler üçin iş şertlerini standartlaşdyrmagy, ýol howpsuzlygyny ýokarlandyrmagy we pudakdaky adalatsyz bäsdeşligi azaltmagy maksat edinýän Ýewropa Birleşiginiň düzgünleriniň toplumydyr. Ýollarda hereket etmegiň Toplumy sürüjilere ulaga erk etmek üçin ygtyýarlyk bermek boýunça täzeden seredilen ýörelgeleri, iş wagtyny hasaplamagyň kadalaryny, şeýle hem hökmany dynç alyş döwürlerini we bazasyna gaýdyp gelmek talaplaryny düzgünleşdirýär.
Düzgünler 561/2006 Reglamentde göz öňünde tutulan we kabotaž we kross-söwda amallary üçin beýleki Ýewropa Birleşiginiň ýurtlaryna sürüjileri iberýän ähli kompaniýalara degişli bolup durýar. Ozal bu düzgünler umumy agramy 3,5 tonna çenli ulaglary ulanýan halkara ýük ulaglary bilen meşgullanýan kompaniýalara degişli däldi. Soňky ýyllarda şeýle kompaniýalaryň sany barha köpelýär we birnäçe ýurt olary ýol ulaglarynyň işe kabul edilmegini düzgünleşdirýän 1071/2009 Reglamentiniň (ÝB) düzgünlerine girizmek kararyna geldi.
Reglamente girizilen bölekleýin düzediş 3,5 tonna çenli agramy bolan ulaglar üçin düzgünleri sazlaşdyrmak we ulag pudagyndaky bar bolan standartlary ýokarlandyrmak, şeýle hem dürli ýurtlarda ýük daşaýjylaryň arasynda bar bolan bäsdeşlik şertlerini deňlemek üçin zerur hasaplandy. 2025-nji ýyldan başlap, agramy 2,5 bilen 3,5 tonna çenli bolan ulaglarda halkara ýük gatnawlaryny amala aşyrýan daşaýjylaryň hakyky ygtyýarnamasy bolmalydyr.
2025-nji ýylda güýje girýän esasy üýtgeşmeler:
1. Ýolýaka barlaglary we tahograflar.
2. Sürüjiler üçin iş wagtynyň we dynç alyş düzgünleriniň üýtgemegi.
3. Tahograflar üçin bildiriljek täze talaplar.
Çeşme: «Awtomobil ulag hyzmaty»
