Hormatly Prezidentimiz Serdar Berdimuhamedowyň başlyklygynda 3-nji iýulda sanly ulgam arkaly Ministrler Kabinetiniň nobatdaky mejlisi geçirildi we onda döwlet durmuşynyň ileri tutulýan ugurlaryna degişli birnäçe möhüm meseleler ara alnyp maslahatlaşyldy. Bu barada «Türkmenistan: Altyn asyr» elektron gazeti habar berdi.
Mejlisde milli kanunçylygy kämilleşdirmek boýunça durmuşa geçirilýän çäreler we halkara gatnaşyklar barada maglumat berildi. Häzirki wagtda gozgalmaýan emläge bolan hukuklaryň döwlet belligine alynmagy, käbir kodekslere döwrebap üýtgetmeler girizmek boýunça täze kanun taslamalary taýýarlanylýar. Şeýle hem parlament wekilleriniň Hytaý, Awstriýa ýaly döwletlerde tejribe alyşmak çärelerine, şonuň ýaly-da BMG-nyň Çagalar gaznasynyň we Ýewropa Bileleşiginiň guramagynda geçirilen maslahatlara gatnaşandygy bellenildi. Döwlet Baştutanymyz ýurdumyzyň hukuk binýadyny we kanunçylyk işini has-da güýçlendirmegiň zerurdygyny aýtdy.
Ykdysady we maliýe pudagynda makroykdysady durnuklylygy saklamak, ilatyň ýaşaýyş-durmuş derejesini ýokarlandyrmak we innowasion önümçilikleri döretmek boýunça taslamalaryň dowam edýändigi hasabat berildi. Býujet-salgyt ulgamyny has-da kämilleşdirmek, durnukly ykdysady ösüşi üpjün etmek boýunça Hökümet agzalaryna anyk tabşyryklar berildi.
Ýangyç-energetika toplumynyň maddy-enjamlaýyn binýadyny pugtalandyrmak we önümçilik desgalaryny döwrebap enjamlar bilen bökdençsiz üpjün etmek baradaky täze teklipler ara alnyp maslahatlaşyldy hem-de hormatly Prezidentimiz tarapyndan goldanylyp, degişli işleri geçirmek tabşyryldy.
Oba hojalyk pudagynda dowam edýän möwsümleýin işler, aýratyn-da galla oragyny guramaçylykly tamamlamak, hasyly ammarlara daşamak we geljek ýylyň ekişine ýerleri taýýarlamak çäreleri barada hasabat berildi. Şeýle-de gowaça, şaly we gant şugundyry ekilen meýdanlara agrotehniki kadalara laýyklykda ideg etmek, suw serişdelerini tygşytly peýdalanmak boýunça tabşyryklar berildi.
Himiýa senagatyny ösdürmek we ýerli çig mallardan netijeli peýdalanmak ugrunda, hususan-da, "Balkanabat" ýod zawodynda täze innowasion önümçiligi ýola goýmak baradaky teklip makullandy. Daşary ýurt kompaniýalary bilen hyzmatdaşlygy artdyrmak we eksporta niýetlenen önümleri öndürmek boýunça degişli wezipeler kesgitlendi.
Söwda-ykdysady gatnaşyklary ösdürmek maksady bilen, Duşenbe şäherinde geçiriljek Türkmen-täjik işewürler geňeşiniň ikinji mejlisine görülýän taýýarlyk barada hasabat berildi. Bu çärä ýurdumyzyň dürli ministrlikleriniň we telekeçileriň gatnaşmagyna garaşylýar.
Medeni mirasymyzy öwrenmek we taryhy ýadygärlikleri dikeltmek ugrunda alnyp barylýan ylmy-barlag işleri, şeýle-de halkara alymlar bilen bilelikde sanly binýady düzmek boýunça ýerine ýetirilen çäreler barada aýdyldy. Ýaşlaryň arasynda milli gymmatlyklarymyzy wagyz etmek maksady bilen ýörite okuw maslahatlarynyň guralandygy bellenildi.
Ýurdumyzyň şypahanalarynda ilatyň döwrebap dynç almagy we saglygyny berkitmegi üçin saglygy goraýyş hyzmatlarynyň hilini has-da ýokarlandyrmak, lukmançylyk edaralaryny häzirki zaman innowasion enjamlar bilen üpjün etmek boýunça işleri işjeňleşdirmek tabşyryldy.
Häzirki zaman sanly ykdysadyýeti ösdürmek maksady bilen, ýaşlaryň arasynda emeli aň, robototehnika, “akylly” şäher ýaly ugurlar boýunça “Sanly çözgüt — 2026” atly innowasion taslamalaryň bäsleşigini yglan etmek baradaky teklip makullandy. Bäsleşigiň netijeleri “Türkmentel — 2026” atly halkara serginiň çäklerinde jemlener.
