Türkmenistanyň daşary işler ministriniň orunbasary Ahmet Gurbanow Brýusselde geçirilen syýasat we howpsuzlyk meseleleri boýunça «Ýewropa Bileleşigi – Merkezi Aziýa» atly ýokary derejeli dialogyň 13-nji mejlisine gatnaşdy. Duşuşyga gatnaşyjylar sebitara howpsuzlygyň esasy ugurlaryny, serhetleri dolandyrmagy, döwrebap wehimlere garşy durmagy hem-de ulag-logistika durnuklylygyny ösdürmegi ara alyp maslahatlaşdylar. Bu barada Türkmenistanyň Daşary işler ministrliginiň metbugat gullugy habar berýär.

Türkmenistanyň wekili öz çykyşynda sebitiň durnukly ösmeginde hem-de BMG-niň howandarlygynda syýasy-diplomatik gural esasynda döwletleriň arasynda ynanyşmagy berkitmekde «Merkezi Aziýa — Ýewropa Bileleşigi» formatynyň aýratyn ornuny belledi. Şeýle hem Türkmenistanyň bilelikdäki howpsuzlyk maksatnamalaryny, şol sanda CADAP we BOMCA taslamalaryny has-da kämilleşdirmäge ygrarlydygy tassyklanyldy.

Saparyň çäklerinde Ahmet Gurbanow birnäçe ikitaraplaýyn duşuşyklary geçirdi. ÝB-niň Owganystan boýunça Ýörite wekili Žil Bertran bilen geçirilen gepleşiklerde taraplar owgan halkyna ynsanperwer kömegini bermegi utgaşdyrmak we serhetüsti energetika taslamalaryny durmuşa geçirmek meselelerini ara alyp maslahatlaşdylar. ÝB-niň «Global Gateway» başlangyjynyň çäklerinde hyzmatdaşlygyň geljegi, Hazarüsti ulag geçelgesini ösdürmek, şeýle hem gaýtadan dikeldilýän energetika we metanyň zyňyndylaryny azaltmak ugurlary bolsa Türkmenistanyň DIM-niň orunbasarynyň Ýewropanyň daşarky hereket gullugynyň syýasy meseleler boýunça Baş sekretarynyň orunbasary Olof Skug bilen duşuşygynyň esasy temalary boldy.