Aşgabatda 15-nji awgustda Türkmenistanyň daşary syýasy edarasynda Bangladeş Halk Respublikasynyň Hökümetiniň daşary işler ministrliginiň sekretary, ilçi Nazrul Yslamyň ýolbaşçylygyndaky wekiliýet bilen taryhy duşuşyklar hem-de syýasy geňeşmeler geçirildi. Saparyň çäklerinde myhman Türkmenistanyň daşary işler ministri Raşid Meredow we ministriň orunbasary Ahmet Gurbanow bilen gepleşikleri geçirip, iki ýurduň arasyndaky syýasy, söwda-ykdysady we medeni-ynsanperwer hyzmatdaşlygyň möhüm meselelerini ara alyp maslahatlaşdy. Bu barada Türkmenistanyň Daşary işler ministrligi habar berdi.

Gepleşikleriň barşynda diplomatlar ikitaraplaýyn gatnaşyklary täze derejä çykarmak üçin ýokary we iň ýokary derejelerdäki saparlary guramagyň, şeýle hem daşary işler ministrleriniň özara saparlaryny amala aşyrmagyň maksadalaýykdygyny tassykladylar. Şeýle hem taraplar BMG we beýleki abraýly halkara we sebit düzümleriniň çäklerinde parahatçylygy, asudalygy hem-de durnukly ösüşi üpjün etmäge gönükdirilen başlangyçlary özara goldamagyň netijeligini kanagatlanma bilen nygtadylar.

Iki ýurduň daşary syýasy edaralarynyň arasynda geçirilen syýasy geňeşmelerde şertnama-hukuk binýadyny giňeltmek maksady bilen birnäçe resminamalaryň taslamalaryna seredildi hem-de parlamentara gatnaşyklary işjeňleşdirmegiň mümkinçilikleri maslahatlaşyldy. Söwda-ykdysady hyzmatdaşlygy ösdürmek çäklerinde Türkmenistanyň Söwda-senagat edarasy bilen Dakkanyň söwda-senagat palatasynyň arasynda göni aragatnaşygy ýola goýmak, nebitgaz, ulag, oba hojalygy we dokma senagaty ýaly ugurlarda hyzmatdaşlygy berkitmek barada ylalaşyldy.

Mundan başga-da, taraplar medeniýet, bilim we syýahatçylyk pudaklaryndaky gatnaşyklary ösdürmäge aýratyn üns berip, Aşgabatda gazanylan ähli ylalaşyklaryň ýakyn geljekde iş ýüzünde durmuşa geçiriljekdigine uly ynam bildirdiler.