Hytaý Halk Respublikasynyň Şanhaý şäherinde 5-nji noýabrda 9-njy Hytaý halkara import harytlary sergisi (CIIE 2026) öz işine başlady. «Täze eýýam — umumy geljek» şygary astynda geçirilýän iri halkara çärä Türkmenistanyň Söwda-senagat edarasynyň gatnaşmagynda guralan milli pawilýon ýurdumyzyň ykdysady kuwwatyny, eksport mümkinçiliklerini we milli önüm öndürijileriň gazanan üstünliklerini görkezýän möhüm meýdança hökmünde çykyş edýär. Bu barada Türkmenistanyň Söwda-senagat edarasynyň metbugat gullugy habar berdi.
Türkmenistanyň pawilýonynda ýurdumyzyň dokma, himiýa, oba hojalyk we senagat pudaklarynda öndürilýän ýokary hilli önümleriň giň görnüşi tanyşdyrylýar. Milli önümleriň halkara serginiň çäklerinde görkezilmegi Türkmenistanyň önümçilik mümkinçilikleriniň, eksport kuwwatynyň we dünýä bazarlaryndaky bäsdeşlige ukyplylygynyň aýdyň beýany bolup durýar.
Milli ekspozisiýa daşary ýurtly gatnaşyjylara Türkmenistanyň ykdysadyýetiniň ileri tutulýan ugurlary, maýa goýum mümkinçilikleri, döwrebap önümçilik kuwwatlyklary hem-de baý taryhy-medeni mirasy bilen tanyşmaga mümkinçilik berýär. Şeýle hem bu platforma türkmen kärhanalary üçin täze hyzmatdaşlary gözlemekde, eksport ugurlaryny giňeltmekde we halkara söwda gatnaşyklaryny ösdürmekde möhüm ähmiýete eýedir.
Bu ýylky CIIE sergisi dünýäniň 162 ýurdundan, sebitlerinden we halkara guramalaryndan wekilleri jemledi. Çäräniň meýdançalarynda 4100-den gowrak gatnaşyjynyň önümleri we hyzmatlary görkezilýär. Açylyş dabarasyna 30-dan gowrak ýurduň we halkara guramalaryň ýokary derejeli wekilleriniň gatnaşmagy serginiň dünýä ykdysadyýetindäki ähmiýetini görkezýär.
Açylyş dabarasynda çykyş eden Hytaý Halk Respublikasynyň Döwlet Geňeşiniň Premýer-ministriniň orunbasary Din Sýuesýan ýurduň açyklyk syýasatyny dowam etdirýändigini, halkara söwda gatnaşyklaryny giňeltmäge we daşary ýurtly hyzmatdaşlar üçin amatly şertleri döretmäge uly ähmiýet berýändigini belledi.
Hormatly Prezidentimiz Serdar Berdimuhamedowyň ýolbaşçylygynda türkmen-hytaý strategik hyzmatdaşlygyny ösdürmek, söwda-ykdysady gatnaşyklary giňeltmek we halkara ykdysady hyzmatdaşlygyň täze ugurlaryny döretmek Türkmenistanyň daşary syýasatynyň möhüm ugurlarynyň biri bolup durýar. Deňhukuklylyk, özara hormat goýmak we umumy bähbitlere esaslanýan döwletara gatnaşyklar häzirki döwürde täze mazmun bilen baýlaşýar.
Şanhaýda geçirilýän CIIE 2026 sergisi Türkmenistan bilen Hytaýyň arasyndaky söwda-ykdysady hyzmatdaşlygy has-da ösdürmek, täze hyzmatdaşlyk ugurlaryny kesgitlemek we türkmen önümleriniň dünýä bazarlaryndaky ornuny berkitmek üçin netijeli mümkinçilik döredýär.
Türkmenistanyň milli pawilýonynyň bu abraýly halkara çärä gatnaşmagy ýurdumyzyň dünýä ykdysady giňişligine işjeň goşulyşýandygyny, eksport ugurlaryny diwersifikasiýalaşdyrmaga we daşary ýurtlar bilen özara bähbitli gatnaşyklary ösdürmäge ygrarlydygyny görkezýär.
