Mart aýynda dünýäniň awtoulag bazarynda satylan ýeňil we täjirçilik ulaglarynyň sany 8,026 million birlige deň bolup, munuň özi bir ýyl ozalkydan 1,9% köpdür. «GlobalData» tarapyndan geçirilen barlag-derňew işleri birinji çärýekde satuwyň 4,4% ýokarlanyp, 20,762 million birlige ýetendigini tassyklady. Hytaý mart aýynda 2,154 million ulagy ýerlemek bilen, awtoulag satuwy boýunça reýtingiň birinji basgançagynda ýerleşdi. Bu bolsa bir ýyl ozalky görkeziji bilen deňeşdirilende, 5,2% artykdyr. Ýeri gelende bellesek, Amerikanyň Birleşen Ştatlary bu ugurdaky reýtingiň liderligini fewralda Täze ýyl baýramyny bellän Hytaýdan almagy başarypdy. Mart aýynda bolsa ABŞ-da 1,437 million awtoulag satylyp, 5,5 göterim ösüş gazanyldy. Mart aýynda Günbatar Ýewropa ýurtlarynda satuw 1 million 454 müň awtoulaga (−1%) ýeten bolsa, Gündogar Ýewropada 21% ýokarlanyp, 404,8 müň birlik boldy. Russiýada, Ukrainada we Türkiýede bolsa satuwyň artandygy habar berildi. Günorta Amerikada 200 müň awtoulag satylyp, bu görkeziji bir ýyl ozalkydan 10,7% azdyr. Şeýle hem Ýaponiýanyň (448 müň birlik, -21%), Kanadanyň (158,8 müň birlik, + 7,2%) we Günorta Koreýanyň (143,4 müň birlik, -12,1%) netijeleri aýan edildi.
