Türkmenistanyň daşary işler ministriniň orunbasary Mähri Bäşimowa bilen Belgiýa Patyşalygynyň Türkmenistandaky Adatdan daşary we Doly ygtyýarly ilçisi (oturýan ýeri Baku şäheri) Žýulýen de Fraýponyň arasynda duşuşyk geçirildi. 30-njy martda Türkmenistanyň Daşary işler ministrliginde geçirilen duşuşygyň barşynda ikitaraplaýyn hyzmatdaşlygyň möhüm meseleleri ara alnyp maslahatlaşyldy. Söhbetdeşlikde syýasy-diplomatik dialogy, iki ýurduň Daşary işler ministrlikleriniň ugry boýunça hyzmatdaşlygy ösdürmek, şeýle hem türkmen-belgiýa gatnaşyklarynyň şertnama-hukuk binýadyny kämilleşdirmek meselelerine aýratyn üns berildi. Türkmenistanyň Ýewropa döwletleri bilen hyzmatdaşlygyny mundan beýläk-de pugtalandyrmagyň möhümdigi bellenilip, şunda Belgiýanyň Türkmenistanyň Ýewropa Bileleşigi bilen hyzmatdaşlygyny ösdürmekdäki möhüm orny nygtaldy. Halkara meýdançalardaky, ilkinji nobatda, BMG-niň çäklerindäki hyzmatdaşlyk hem ara alnyp maslahatlaşyldy. Söwda-ykdysady ugra-da aýratyn ähmiýet berip, taraplar işewür toparlaryň gatnaşmagynda bilelikdäki çäreleri geçirmek, işewürlik gatnaşyklaryny işjeňleşdirmek boýunça pikir alyşdylar. Duşuşykda medeni-ynsanperwer ugurda hyzmatdaşlygyň geljegi, şol sanda ýokary okuw mekdepleriniň arasyndaky gatnaşyklary ösdürmek meseleleri hem ara alnyp maslahatlaşyldy. Çeşme: Türkmenistanyň Daşary işler ministrligi