Türkmenistanyň ulag-logistika kuwwatynyň barha barha ýokarlanýan we Gündogar bilen Günbataryň, Demirgazyk bilen Günbaryň arasynda esasy köprä öwrülýän häzirki döwründe ýollaryň howpsuzlygyny we ulag hyzmatlarynyň ýokary hilini üpjün edýän esasy düzümleriň biri hem «Türkmenulaggözegçilik» döwlet kärhanasydyr. Bu edaranyň düýbi mundan 30 ýyl gowrak ozal, ýagny 1994-nji ýylyň fewralynda «Türkmentransinspeksiýa» ady bilen tutulypdy. Şondan bäri geçen döwürde kärhana diňe bir içerki ulag bazaryny kadalaşdyrmak bilen çäklenmän, eýsem ýurdumyzyň halkara derejesindäki bäsdeşlige ukyplylygyny artdyrmakda we üstaşyr geçýän ýükleriň möçberini köpeltmekde hem ygtybarly daýanja we uly güýje öwrüldi.
Häzirki wagtda döwlet kärhanasy ýurdumyzyň üstaşyr ulag geçelgeleriniň mümkinçiliklerini giňeltmek ugrunda durnukly gadam urýar. Halkara gatnawlaryny we serhetüsti amallaryny kadalaşdyrmakda hem kärhana möhüm orun eýeleýär. «Türkmenulaggözegçilik» tarapyndan daşary ýurt ulaglaryna ýurdumyzyň çäginden geçmek we üçünji döwletlerden ýük getirmek üçin ýörite rugsatnamalar gysga wagtda, resmi we takyk resmileşdirilýär.
Şonuň bilen birwagtda, gümrük-gözegçilik nokatlarynda daşary ýurt tirkegleriniň we ýarym tirkegleriniň wagtlaýyn goýberilmegine seredilip, serhetden geçýän her bir türkmen hem-de daşary ýurt ulagynyň tehniki taýdan kemsiz bolmagy doly gazanylýar. Ýurdumyzyň çägine wagtlaýyn giren bu daşary ýurt ulaglaryny gaýtadan hasaba almak we olaryň hereketini yzygiderli gözegçilikde saklamak hem edaranyň halkara ülňülere laýyk gelýän esasy iş ugurlarynyň biridir.
Edaranyň hünärmenleri awtoulaglarda ýük we ýolagçy daşamagyň howpsuzlygyna gije-gündiz gözegçilik edip, ilata edilýän hyzmatlaryň medeniýetiniň döwrebap we ýokary derejede saklanmagyna uly goşant goşýarlar. Şeýle hem, logistika, tarif, utgaşdyryjy ulgamlarda we ulag-ekspedisiýa işinde kanunçylygyň talaplarynyň gyganyksyz ýerine ýetirilmegi, isleg bildirýän taraplara duralga we häzirki zaman tehniki hyzmatlarynyň hödürlenmegi kärhananyň gündelik işiniň özeni bolup durýar. Fiziki we ýuridiki şahslaryň ulag serişdelerini, tirkeglerini bellige almak, synag barlaglaryndan geçirmek we güwälendirmek işleri hem anyk seljermeler esasynda we gysga möhletlerde amala aşyrylýar.
Kärhananyň alyp barýan köpşahaly işleri munuň bilen hem çäklenmeýär. Ol ýol hereketiniň howpsuzlyk kadalaryny, täze tehniki şertleri we ýörite düzgünleri işläp düzmek, ulag ulgamyndaky maglumatlary yzygiderli seljermek ýaly strategik wezipeleri hem üstünlikli ýerine ýetirýär. Şunuň bilen birlikde, her ýylda ugurdaş edara-guramalar bilen bilelikde tassyklanan meýilnamalara laýyklykda barlaglar we monitoring işleri guralýar.
Ýollarda we üstaşyr geçelgelerde tertip-düzgüni pugtalandyrmak maksady bilen, Türkmenistanyň Administratiw hukuk bozulmalary hakyndaky kodeksine laýyklykda barlaglar guralyp, ýüze çykarylan düzgün bozulmalary we kemçilikler boýunça jerime amallary takyk ýerine ýetirilýär hem-de ýygnalan serişdeler döwlet býujetine yzygiderli we bökdençsiz geçirilip durulýar.
Bu döwrebap barlag, gözegçilik we utgaşdyryş ulgamy Türkmenistanyň sebitdäki we dünýädäki iň ygtybarly, howpsuz hem-de durnukly ulag-logistika merkezine öwrülmegine özüniň saldamly goşandyny goşmagyny dowam edýär. Kärhananyň her bir ädimi, ýurdumyzyň ykdysady kuwwatynyň barha berkemegine gönükdirilendir.
