Türkmenistanyň Prezidenti Serdar Berdimuhamedow iki günlük döwlet sapary bilen Gruziýa bardy. Tbilisi şäheriniň Şota Rustaweli adyndaky Halkara howa menzili belent mertebeli myhmanyň gelmegi mynasybetli iki ýurduň Döwlet baýdaklary bilen bezeldi. Bu ýerde Türkmenistanyň döwlet Baştutanyny resmi adamlar dabaraly garşyladylar, soňra bolsa Gruziýanyň Prezidentiniň «Orbeliani» köşgünde belent mertebeli myhmany resmi garşylamak dabarasy boldy. Bu ýerde hormat garawulynyň serkerdesi dabaraly hasabat berdi, iki ýurduň Döwlet senalary ýaňlandy, diýip Türkmenistanyň Döwlet habarlar agentligi habar berýär.
Resmi dabaralardan soň, Prezident Serdar Berdimuhamedow bilen Gruziýanyň Prezidenti Mihail Kawelaşwili ýokary derejeli gepleşiklerini geçirdiler. Duşuşygyň dowamynda döwlet baştutanlary ikitaraplaýyn hyzmatdaşlygyň ileri tutulýan ugurlaryny ara alyp maslahatlaşdylar. Taraplar parlamentara gepleşikleri, söwda-ykdysady gatnaşyklary ösdürmäge, şeýle hem ulag-logistika we port düzümi ulgamyndaky hyzmatdaşlyga aýratyn üns berdiler. Türkmenistanyň Prezidenti Türkmenistan — Azerbaýjan — Gruziýa — Rumyniýa ugry boýunça «Hazar deňzi — Gara deňiz» halkara üstaşyr we ulag geçelgesini döretmek baradaky başlangyjy goldaýandygyny ýene-bir gezek tassyklady.
Saparyň maksatnamasynyň çäklerinde «Expo Georgia» sergi merkezinde Türkmen-gruzin işewürlik forumy geçirildi we oňa Türkmenistanyň Prezidenti Serdar Berdimuhamedow hem-de Gruziýanyň Premýer-ministri Irakli Kobahidze gatnaşdy. Milli Liderimiz forumda çykyş edip, ýurdumyzyň ykdysady kuwwatyny, şol sanda jemi içerki önümiň ösüş depginini 6,3 göterim derejesinde saklamaga gönükdirilen 2026-njy ýyl üçin Maýa goýum maksatnamasynyň meýilnamalaryny beýan etdi. Şeýle hem döwlet Baştutanymyz Gruziýanyň Gara deňiz kenarynda Türkmenistanyň ýük terminalyny döretmek boýunça gepleşikleriň alnyp barylýandygyny mälim etdi. Forumyň ahyrynda belent mertebeli myhman we Gruziýanyň Hökümetiniň ýolbaşçysy Türkmenistanyň ministrlikleriniň hem-de hususy pudagynyň önümleriniň giň gerimli sergisi bilen tanyş boldular.
